Lugansk

Lugansk
Луганськ (ukr.)
Луганск (ven.)

Lidnanznam	Flag
Valdkund	Ukrain
Eläjiden lugu (2018)	406,729 ristitud
Pind	286,2 km²
Pämez'	Sergei Kravčenko (sulaku 2006—) / Manolis Pilavov (eloku 2014—)
Telefonkod	+380−642
Aigvö	UTC+3

Lidnan kart (2021)

Lugansk (ukr.: Луганськ, ven.: Луга́нск) om Ukrainan lidn valdkundan longibokas. Se om Luganskan agjan administrativine keskuz.

Istorii

Eländpunktan aluz om pandud vl 1795 Jekaterina II-imperatornaižen käskön mödhe kuti Luganskan raudanvalamižtegim da žilo senno, ezmäine mugoine Venäman imperijan suves. Se sai lidnan oiktusid vl 1882. Vll 1935−1958 i 1970−1990 lidnan nimi oli Vorošilovgrad.

Vlpäi 2014 Luganskan Rahvahaline Tazovaldkund-organizacii de-fakto kontroliruib lidnad, miše ukrainalaine ohjastuz ei tundišta. Luganskan pämehed oma Sergei Kravčenko (oficialižen Ukrainan polespäi) i Manolis Pilavov (LRV:an polespäi)

Edel sodad Ukrainan päivnouzmas (vn 2014 sulakuspäi) Lugansk šingotihe mašiništonsauvomižen tegimil (kaivuzladimed, avtopalad), raudan metallurgijal (teraz, torved, torvarmatur), sauvondmaterialiden pästandal, akkumulätoriden i zelliden tegimil, maidtegimel, kengiden i omblendan edheotandoil.

Geografijan andmused

Lidnan nell' rajonad da alištunuded Radale eländpunktad (2014)

Lidn sijadase Lugan'-jogen randoil (ukr. i ven.: Лугань, 198 km pitte, Donan oigedpol'ne bassein), om nimitadud sen mödhe. Lugansk seižub 78 m ü.m.t. keskmäižel korktusel. Matkad Kijevhasai om 650 km lodeheze-päivlaskmha orhal, 860 km avtol vai 900 km raudtedme.

Klimat om ven kontinentaline stepin. Voden keskmäine lämuz om +8,8 C°, kezakun-elokun +20,1..+22,3 C°, tal'vkun-uhokun −2,0..−4,0 C°. Ekstremumad oma −41,9 C° (viluku) i +42,0 C° (heinku, eloku). Kezaaigan minimum om −1,8 C° (kezaku), tal'vaigan maksimum om +18,0 C° (uhoku). Ei voi panda halad heinkus vaiše (minimum +5,2 C°). Paneb sadegid 503 mm vodes, läz tazomäras kuidme, enamba semendkus-heinkus (50..63 mm kus), toižiš kuiš 32..45 mm kus.

Eläjad

Vn 2014 augotišes Luganskan eläjiden lugu oli 424 113 ristitud (11. sija valdkundas), sen-žo voden tal'vkus 301 tuhad ristituid (äi pagenuzid sodategendoišpäi), pind — 269,61 km². Kaikiš suremb lidnan ristitišt oli 552 300 eläjad vl 1987.

Irdkosketused

• Lidnan Ukrainan tobmuden sait (gorod.lugansk.ua). (ven.) (angl.)
• Lidnan informacine da uzištusiden sait (gorod-lugansk.com). (ven.)