Estrech
Un estrech (var. estreit, estret, destrech, destreit) es un passatge d'aiga natural e pro larg que connècta dos espandis d'aiga (de mars, d'oceans o de lacs), e que se tròba entre doas massas de tèrra. Fòrça estreches an una importància economica e estrategica, que fan partida d'importantas rotas comercialas, e lor revendicacion provoquèt de conflictes internacionals per se n'assegurar lor quite contraròtle.
Entre los estreches mai importants se tròban la Marga, que connècta la mar del Nòrd amb l'ocean Atlantic; l'Estrech de Gibartar, qu'es lo sol passatge natural entre l'Ocean Atlantic e la Mar Mediterranèa; lo Bosfòr e los Dardanèls, que fan comunicar la Mediterranèa e la Mar Negra; o encara l'estrech de Bering entre Russia e Alaska, que fa comunicar l'Ocean Pacific amb l'Ocean Artic.