正多邊形

正多邊形係一種多邊形，條條邊一樣長，隻隻角一樣大。最少邊嘅一種係等邊三角形，之後到正方形、正五邊形、正六邊形，如此類推。一般都唔會當正一邊形、正二邊形做正多邊形。

性質

• 正多邊形可以被一個圓形包住，所有頂點都喺圓周上，呢個圓叫做外接圓；
• 而係正多邊形裡面，都可以有個圓形，同每條邊嘅中點相切，呢個圓叫做內切圓。

• 固定周界之下，邊數趨向無限，就會變成圓形；

• 固定邊長之下，邊數趨向無限，就會變成正無限邊形。

• 狹義嚟講，正多邊形淨係指簡單多邊形，邊唔會穿過自己，角全部凸出。廣義嚟講，正多邊形嘅邊可以穿過自己，變到帶凹位嘅星形咁，例如係正五角星。

• 正多邊形有對稱嘅特性，有軸對稱，亦都有旋轉對稱，以抽象代數嘅語言嚟講，正n-邊形嘅對稱羣係二面體羣$D_{2n}$。

睇埋

• 多邊形
• 正三角形
• 正方形
• 圓形
• 凸多邊形