字幕

出自維基百科，自由嘅百科全書
跳去導覽 跳去搵嘢
英文字幕例子：
Let me help you!​——​等我幫你啦！
Thank you.​——​唔該。

字幕（粵拼：zi6 mok6）係一種文字性質嘅無障礙輔助科技[註 1]，負責顯示電視、電影、舞台劇同短片入面嘅聲、旁述同對白之類嘅非影像內容，係响作品後期加工嗰時加嘅。對白字幕通常都會喺螢光幕下方出現，而舞台劇嘅字幕，就可能會打落舞台兩邊或者上方。

字幕有好多用途：首先，字幕可以起到翻譯嘅作用，唔識聽外語嘅觀眾睇住字幕，可以既聽到原作嘅聲，又理解得到作品嘅內容；另一方面，字幕又幫到聾啞人士欣賞影視作品，跟住仲起到下斜路緣效應，聽覺健全但礙於環境唔方便開聲聽嘢嘅人，都可以知對白係乜。

因為字幕咁有用，做媒體嘢嗰陣好多時都會有 teamtim1 人專門處理字幕，而好似係 YouTube 等嘅平台都有設置工具，畀用家輕易噉喺影片嗰道落字幕。甚至乎仲有媒體工作者寫書撰文，深入探討字幕要點樣整[1]。

基本類型

[編輯]
睇埋：翻譯同標題咭

語言

[編輯]
語言內字幕：呢幅圖取自美國電影《花都奇遇結良緣》，畫面上有英文字幕（下方嘅文字）。想學英文嘅人可以一路睇戲一路睇住字幕嚟學。

最基本上，字幕可以分做語言內[e 1]同語言間[e 2]兩大類[註 2][2]。

語言間字幕，或者叫跨語言字幕，係指字幕所用嘅書寫語言同片中嘅口語語言唔同。例如英文電影有粵文字幕（幫到以粵語做母語嘅人學英文）或者粵語 YouTube 影片有中文書面語字幕（幫到例如台灣人理解影片內容）呀噉。語言間字幕通常係用嚟幫人理解片中嘅話語[3]，不過喺某啲情況下，語言間字幕可以係源自故事上嘅需要[1]:1.5.4 ​——​例如一套電影，佢嘅情節講到一個英國出身嘅角色啱啱嚟到香港，佢淨係識英文完全唔識粵語，而成個故仔就講佢要克服溝通上嘅困難；喺呢種情況下，套戲嘅粵語版正常就唔會畀呢個角色講粵語，而係要佢講英文，不過佢講嘢嗰陣畫面會有返粵文或者中文書面語字幕。

語言內字幕就啱啱相反，指字幕嘅書寫語言係寫到盡可能似片中口語嘅，即係例如粵語影片落粵文字幕噉[註 3]。呢類字幕都有好多用途[1]:p 12-17 ​——​

  • 無障礙輔助科技：字幕幫到聾啞人士欣賞影視作品，有啲選單（例如 DVD 入便嗰啲）仲會標明「呢套字幕係專為聾啞人士而設嘅」等嘅資訊。
  • 唔方便開聲聽：字幕幫到聾啞人士嘅功用亦有佢嘅所謂下斜路緣效應[e 3]，令聽得到嘢但係礙於環境唔方便開聲聽嘅人，都可以唔使聽就知對白係乜[4]。
  • 幫人學習語言：想像依家有個識少少日文嘅人睇全日版（講日語，字幕寫日文）嘅動畫，藉此進一步提升自己嘅日文水平。
  • 幫兒童學閱讀：由「識講嘢但唔識字」去到「識字」嘅過程當中，細路需要喺腦入便將口語同書寫語言聯想埋一齊，而字幕可以助長呢個過程[5]。
  • 應對口音問題：有陣時，一位演員可能要喺劇中飾演一位口音好重嘅角色，部份觀眾聽唔明佢噏乜，加返字幕就可以舒緩呢個問題[註 4]。
  • 卡拉 OK：畀啲人喺卡拉 OK 嗰道跟住字幕唱歌。
  • 搜尋器：字幕亦可以補救網絡搜尋器唔識處理旁述同對白嘅問題，令搜尋器可以憑字幕嘅文字內容去判斷影片係咪用家想要嘅嘢。

等等。

對象

[編輯]
睇埋：聾啞

喺某啲地區，畀聾人同聽障人士用嘅字幕同其他字幕有根本上嘅分別，而主要係使唔使喺字幕度描述埋對白以外嘅其他聲，同使唔使（喺某啲情況下）寫明講嘢嘅人係邊個[6]。喺北美，對象係聾人同聽障人士嘅字幕包括 CC [e 4]，直譯隱閉式電視字幕[註 5]）同 SDH（[e 5][註 6]，直譯為聾人同聽障人士而設嘅字幕），對象係其他人嘅叫 non-SDH（直譯唔係為聾人同聽障人士而設嘅字幕）[6]。

除咗噉之外，可能仲會分其他對象。例如，喺北美，另外亦有種字幕叫 FN [e 6]（直譯強制旁白），喺字幕入面加插對白同旁述冇嘅其他註釋，又或者對白嘅翻譯等等，對象可能包括睇唔明畫面或者聽唔明對白嘅人[7]。

準備時間

[編輯]
内文：速記

字幕亦可以按「有幾多時間準備」嚟分類。字幕可以影片整好後先加，不過又有啲字幕係 live 嘅：即係片中人一路講嘢，負責字幕嘅人就一路即場整，呢種情況常見於現場直播嘅新聞報道或者清談節目等等​——​製作組無法事先知道啲人喺節目上會講乜；响廿世紀，即場字幕會攞速記[e 7]用嘅鍵盤嚟打，可能講嘢嘅聲出現咗一兩秒，字幕就已經打咗出嚟[8]，而廿一世紀初嘅業界仲開始採用語音識別技術做輔助。

唔係即時做嘅字幕，造字幕嘅人好多時會用腳掣，用嚟聽段片嘅時候跳前跳後。

閂唔閂得

[編輯]
睇埋：菲林

字幕亦可以按閂唔閂得嚟分，閂得嘅叫隱閉式[e 8][註 7]，唔閂得嘅叫開放式[e 9][註 8]。

喺舊陣時，一套電影嘅字幕可能係「嵌咗入」套戲嗰道嘅，意思即係話製作組用特製技術將啲字幕加落套戲嘅菲林道，呢種字幕係冇得「閂咗佢」嘅。到咗廿一世紀初，好似 YouTube 等嘅平台，都有工具畀用家以電子方式喺影片嗰道落字幕，呢啲字幕通常都係可以閂埋嘅。

製作技巧

[編輯]
睇埋：可讀度

無論中西，都有好多媒體工作者喺度討論「字幕應該點整先至啱」。不過到咗廿一世紀初，整字幕技巧依然係個有爭議性嘅課題，唔同嘅媒體工作者同學者持有唔同意見。因為噉，教人整字幕嘅指引好多時都寫得好籠統[1]:4.3。

喺最基本上，字幕通常置中對齊，顏色會係淺嘅顏色，尤其係白色同黃色。

時間特性

[編輯]
睇埋：每分鐘字數

字幕嘅出現時間亦好重要。事實表明，字幕出現得早得滯或者遲得滯，都會干擾觀眾欣賞影片[9]。正常嚟講，字幕並冇必要做到同講嘢嘅聲「完美同步」​——​某段對話相應嘅字幕可以（例如）喺段語音嘅半秒前出現[註 9]，並且喺段語音完咗半秒先至消失。而且喺好多情況下，製作組都會容許字幕同語音有輕微嘅「唔同步」。例如如果字幕身處嗰一幕背景顏色太淺（字幕通常淺色）或者可能佢會遮住啲重要嘢，製作組都會考慮畀段字幕稍為延遲或者提早出現，除此之外，如果有多個角色同時講嘢，製作組都有可能會畀段字幕延遲或者提早出現[1]:4.4。

另一個重要嘅字幕時間特性係段字幕維持幾耐。中西都有所謂嘅字幕黃金法則，講到一段字幕最少應該要維持若干秒，但係具體嘅數值就中西各有不同。喺大中華地區，一般認為一段字幕要起碼出現三秒，而喺歐美都有同樣嘅「黃金法則」，不過佢哋條分界線就係六秒[10]。

字幕之間應該要相隔一定嘅時間[1]:4.4。有影視工作者指，假如兩段字幕連續出現（兩者之間並冇任何冇字幕嘅畫格），觀眾好多時都會一時間意識唔到字幕已經變咗，因而出現混亂，所以是但搵兩段相鄰嘅字幕，佢哋之間起碼應該隔咗一段短嘅時間​——​可能係例如 0.10 秒咁短。

一般認為，一段字幕唔應該「跨越多過一個 shot」：當畫面轉 shot 嗰陣，屬於前一個 shot 嘅字幕都應該消失；而唔少工作者主張，一個有字幕嘅畫面轉 shot 嗰時，字幕消失同轉 shot 唔應該同時發生，而係應該要（例如）喺轉 shot 前 0.1 秒消失[11]。

空間特性

[編輯]
睇埋：眼郁動

一般認為，字幕唔應該做注意力中心。字幕喺空間特性上有必要配合呢一點[1]:4.3：

  • 字幕通常要擺喺冇咁當眼嘅地方，而喺廿一世紀初無論中西，字幕最常見係擺畫面下方，而日韓等地亦有做法係將字幕擺喺畫面右方打戙寫嘅；
  • 字幕亦唔可以太過掗埞​——​有一種講法係，字幕喺畫面入便嘅高度唔可以超過成個畫面嘅高度嘅三分之一，正路唔會超過兩行字，用中文字寫嘅話每行唔超過 13 至 15 個字[9]，因為字幕長得滯，觀眾就可能對眼要大幅度郁動，對佢哋造成不適。由於畫面好多時最下方會預留兩行字咁大嘅空間擺字幕[註 10]，得一行嘅字幕通常會擺喺第一行字嘅空間，以防啲字離畫面中心太遠，觀眾睇得唔舒服[12]。

喺某啲情況下，字幕有可能需要「移位」：例如可能套劇去到其中一幕，畫面最底嗰笪空間顏色淺，搞到啲字幕唔清楚[註 11]；除此之外，無論電影、電視劇定視像遊戲都好，雖然話重要嘢通常都會擺中心（字幕擺畫面邊緣位唔會阻礙觀眾欣賞），但亦有部份作品可能會將重要嘢擺喺近畫面邊緣位置，噉嘅話字幕就有可能遮住啲重要嘢。喺呢啲情況下，製作組可能會考慮將部份嘅字幕移位，移去（例如）稍為右啲或者稍為上啲嘅位[13]。

其他特性

[編輯]

某啲類型嘅字幕唔會跟足對白，例如，如果喺預先錄影嘅訪問節目入便，啲人講到嘞嘞 kak1 kak1，字幕可能會經過編輯，搵編輯「執靚佢」，但係如果係現場直播，字幕可能會盡可能如實打晒入去[2]:12。

喺某啲影視作品之中，唔同角色講嘅字幕會用唔同色或者唔同字體，或者索性加埋講緊嘢嗰個角色嘅名，即係例如喺句對白前加「阿明：...」嚟強調句嘢係阿明講嘅。呢點對於幫助聾啞人士理解內容嚟講零舍重要。對於幾時一定要加名，幾時唔使，可能有業界標準，唔同國家地區可能會採取唔同做法[2]:20。

語言學分析

[編輯]
英文書寫系統：反映唔到重音
英文有詞重音現象，意思即係話喺口語當中，多音節字詞「邊截音節重音」可以幫手區分詞義，例如 permit 噉[14]：
如果發音係 /ˈpər-mit/（第一截音節重音）隻字詞係名詞指准許證。
如果發音係 /pər-ˈmit/（第二截音節重音）隻字詞係動詞指准許。

但書寫上，兩隻字詞都係寫做 permit 噉款​——​由此可見，英文書寫系統做唔到完美反映語音。

睇埋：語言學、語用、語言韻律同贅語

首先，文字唔能夠完美噉反映語言：無論係用粵文（合乎粵語文法同用詞）嚟寫粵語對白，或者用白話字寫閩南話，定係用英文寫英語，口講出嚟嘅聲梗會有抑揚頓挫或者語氣，係文字未必表達到嘅，所以將語音轉化做文字，實會有資訊喪失。有學者話，呢點查實好重要​——​人類聽口語嘅速度，明顯快過佢哋睇文字嘅速度，而呢啲學者有時仲會結合心理語言學[e 10]方面嘅知識，剖析「人類處理語音同處理文字有咩唔同」，並且探究呢方面嘅知識會唔會對字幕製作有所啟示[15]。

事實係，字幕製作人有好時仲會刻意「縮減」或者「省略」字幕內含嘅其中一啲資訊。喺某一啲語言，理由會係字幕可以顯示嘅字數有限，唔簡化會唔夠位寫；另一個常見理由係，某啲語言口語講嘢會用好多不必要嘅字詞表達自己想講嘅嘢，例如英文就會有噉嘅講法[1]:6.3，

I should really be going .
代名詞 情態動詞 副詞 動詞 動名詞
我 應該 / 一定 真係 走 / 離開

成句嘢意思其實係我一定要走喇或者我真係唔留得 le5 噉嘅意思。但係逐字翻譯就會譯到變咗我真係應該走喇之類嘅句子，累贅之餘，其實表達唔到原意。簡化啲噉寫我要走喇反而比較切合原意。而事實係如果製作組要同呢句對白整（例如）粵文或者法文字幕，好有可能會選擇整做我要走喇以及 Je dois partir ​——​兩句嘢都表達到個重點意思，而且明顯短過原句。而字幕縮短咗，就冇咁易超出字幕嘅時間空間限制。

考慮埋文化

[編輯]
睇埋：文化翻譯

唔同語言之間本質上就存在文化差異。處理語言間字幕必定要考慮埋呢一點。

唔同語言使用意思嘅方式都唔同。舉例說明，例如日本話就有個用法，ちょchoっとtto，呢句嘢就噉字面解可以當係有些少噉解，例如ちょっと難しい可作形容詞短語指有啲難噉嘅意思[16]。但係喺實際嘅日本話交談當中，啲人成日都會講以下噉嘅語句[17]：

これ は ちょっと …
Kore wa chotto
代名詞 主題標記 副詞
呢樣嘢 有啲...

句嘢字面譯，可作粵文呢樣嘢有啲...或者呢嚿嘢有啲...等嘅語句，但係喺語用上，呢句嘢好多時都係用嚟婉轉噉表達自己「唔多鍾意」講緊嗰樣嘢，所以唔少人會選擇將句嘢譯做我唔多鍾意呢件嘢或者類似嘅語句。由此可見，語言間字幕嘅翻譯要考慮唔同語言喺語用上有咩分別。

有關跨語言字幕要點樣處理一啲「過度粗俗」嘅字詞（粗口或者性愛相關字眼呀噉），唔同製作人做法都唔同[18]。有好多製作人遇到呢啲字詞嗰陣，會用省略號或者類似嘅字符（例如 [...] 噉）取以代之；不過亦有部份嘅製作組會嘗試用「柔和啲」嘅字詞取代粗俗字詞，例如英文字詞 fuck 噉，隻字詞係粗口，可以係感嘆詞、動詞或者名詞等等，真係當獨立動詞用嗰陣係性交嘅意思，一般認為粵語屌喺意思上最能夠對應英文 fuck [19] ​——​但係採用「粗口柔和化」嘅製作人可能會將句嘢譯做粵語我頂！噉嘅樣。

字幕點整

[編輯]
睇埋：SubRip (字幕檔案格式)、SubRip同文字編輯器

喺互聯網，最常見嘅字幕格式係 SRT（SubRip）[20]，但係佢其實並唔係電視台用開嘅格式[21]；萬維網聯盟嘅草議標準亦唔係佢，而係由佢衍生出嚟嘅 WebVTT。

以互聯網做例，响廿一世紀初，畀人上傳影片嘅平台都會有功能，畀用家輕易噉响影片嗰道落字幕。而因為字幕咁常用，呢類嘅字幕專用嘅檔案格式通常都偏向比較易用：一個字幕快勞會包含一段段字幕，每段字幕都會掕住一啲數值，表示嗰段字幕要喺邊段時間出現，多數檔案格式亦會容許用家提供字體（例如某段字幕使唔使粗體）相關嘅資訊[註 12]。

除咗 SubRip 之外，仲可以睇睇 VSFilter 同埋普世字幕格式等嘅檔案格式，佢哋嘅做法同 SubRip 都係大同小異。但係並唔係所有格式都係噉，例如美國電視台用開嘅係一種叫 SCC 嘅二進制格式[21]。

如果用嘅係文字檔案做基礎嘅檔案格式，整字幕最基本嘅工具只係媒體播放器同文字編輯器；不過一般都會用專用嚟整字幕嘅軟件。大間嘅翻譯社亦通常都唔用呢啲，而係有佢哋自己嘅系統[22]。

無論用乜嘢工具，整字幕都係一種非常之嘥時間嘅工序。專業人員最快都要片長嘅兩至三倍時間（即係一條20分鐘嘅片至少要用40至60分鐘）；生手分分鐘要六倍時間以上（即係一條20分鐘嘅片可能要用成至少兩個鐘頭）。咁嘥時間嘅其中一個原因係整字幕嘅人一定要聽哂（同聽明）成條片嘅內容，先有可能將啲內容打得出嚟，仲要嘜低哂啲時間。以前，專業人員會用腳掣同專業字幕軟件等可以做快啲，但係近年因為對時間嘅準確度要求高咗，腳掣已經冇以前咁有用[23]。

亦有種方法係用語音識別做字幕（例如 YouTube 嘅自動字幕），之後可能再用人手執，但係視乎人工智能做出嚟嘅字幕有幾準，用嘅時間可能同人手做字幕用嘅時間冇分別甚至更長。例如，如果字幕內容錯咗，或者前後用字唔一致，或者時間唔啱，又或者字幕分段唔自然，如果唔係即時字幕，呢啲問題全部都要執。

可以睇埋

[編輯]

參考

[編輯]

註解：

  1. ↑ 呢度講嘅所謂科技係指任何技術或者技巧。
  2. ↑ 有啲人認為語言間嘅叫 subtitle 語言內嘅叫 caption，但係其實唔係噉分。中文就一律係叫字幕。
  3. ↑ 廿一世紀初嘅中文字幕通常會用中文書面語（原則上係基於官話口語嘅），比較少寫粵文。
  4. ↑ 亦可以睇睇方言連續體嘅概念。
  5. ↑ captions 係北美用語，指電視字幕。
  6. ↑ 喺英文，deaf 係泛指聾人，Deaf 係指對 ｢聾人｣ 有身份認同嘅人，特別係主要用手語嘅人。
  7. ↑ 譯名見："closed caption". 《公務員事務局電子辭彙》 (香港中文)。喺2024年8月4號搵到。
  8. ↑ 譯名見：〈藝術通達國際研討會〉。香港展能藝術會。喺2024年8月12號搵到。
  9. ↑ 字幕太早出現，亦可能要擔心字幕造成輕度嘅劇透。
  10. ↑ 中文字較少超過一行嘅字幕，不過歐洲語言就幾常會用呢種字幕。
  11. ↑ 喺呢種情況下，又有種做法係用灰色或者黑色嚟 highlight 啲字幕。
  12. ↑ 想像用標記語言嗰種標記法，嘜實一段字幕要用咩格式。

行話詞彙外語版：

  1. ↑ intralingual，語言內部
  2. ↑ interlingual，語言之間
  3. ↑ curb-cut effect（英式英文：kerb-cut effect）
  4. ↑ closed captions
  5. ↑ subtitles for the d/Deaf and hard of hearing
  6. ↑ forced narrative
  7. ↑ stenography
  8. ↑ closed
  9. ↑ open
  10. ↑ psycholinguistics

文中嘅引用來源：

  1. ↑ 1.0 1.1 1.2 1.3 1.4 1.5 1.6 1.7 Dichevska, S. (2020). Subtitling: Concepts and Practices (Translation Practices Explained), Jorge Díaz Cintas y Aline Remael. 2021. London: Routledge. ISBN: 978-1-3156-7427-8. redit: Revista electrónica de didáctica de la traducción y la interpretación, (14), 108-111.
  2. ↑ 2.0 2.1 2.2 "Closed Captioning Standards and Protocol for Canadian English Language Television Programming Services" (PDF). Canadian Association of Broadcasters. August 2012. 喺2024年8月4號搵到.
  3. ↑ Liu, D. (2014). On the classification of subtitling. Journal of language Teaching and Research, 5(5), 1103.
  4. ↑ Lapiak, Jolanta. "Closed Captioning and Subtitles". Handspeak (英文). 喺2024年8月12號搵到.
  5. ↑ Black, S. (2021). The potential benefits of subtitles for enhancing language acquisition and literacy in children: An integrative review of experimental research. Translation, Cognition & Behavior, 4(1), 74-97.
  6. ↑ 6.0 6.1 Wallace, Jena (December 13, 2023) [March 6, 2023]. "SDH vs. CC: What's the Difference?" (美國英文). 3Play Media. 喺2024年8月13號搵到.
  7. ↑ Wallace, Jena (February 15, 2023) [February 14, 2023]. "What are Forced Subtitles?" (美國英文). 3Play Media. 喺2024年8月19號搵到.
  8. ↑ Barnes, S. B. (2009). Closed Captioning: Subtitling, Stenography, and the Digital Convergence of Text with Television. Technology and Culture, 50(2), 469-471.
  9. ↑ 9.0 9.1 （香港繁體） 2023 中／英字幕大小、長度、字體設定指南，別再亂加字幕！，Subanana，佢哋有講到字幕嘅時間軸。
  10. ↑ Brondeel, Herman. 1994. "Teaching subtitling routines". Meta 34(1): 26-33.
  11. ↑ Robson, Gary D. 2004. The Closed Captioning Handbook. Amsterdam: Elsevier.
  12. ↑ 黃珮珊（2001）。日譯中字幕翻譯與配音翻譯之比較。未出版碩士論文，輔仁大學翻譯學研究所，臺北縣。
  13. ↑ Moving captions & subtitles to the upper third – what, why & how. JBI
  14. ↑ permit. Merriam-Webster.
  15. ↑ Perego, E., Del Missier, F., Porta, M., & Mosconi, M. (2010). The cognitive effectiveness of subtitle processing. Media psychology, 13(3), 243-272.
  16. ↑ （中文） #日字控011：Chotto 等等
  17. ↑ ちょっと (chotto)
  18. ↑ Fox, Wendy. 2017. "A proposed set of placement strategies for integrated titles. Based on an analysis of existing strategies in commercial flms". inTRAlinea, special issue on Building.
  19. ↑ Pang, Chi Ming (2007). Little Dogs are too Lazy to Polish Shoes (小狗懶擦鞋): a Study of Hong Kong Profanity Culture (in Chinese). Hong Kong Subculture Publishing.
  20. ↑ Mahoney, Kelly (June 26, 2024) [May 25, 2021]. "How to Create an SRT File" (美國英文). 3Play Media. 喺2024年8月17號搵到.
  21. ↑ 21.0 21.1 Mahoney, Kelly (September 1, 2023) [August 26, 2022]. "What Is Closed Captioning?" (美國英文). 3Play Media. 喺2024年8月17號搵到.
  22. ↑ Roca, Hayjor. "Earn a living from subtitling" (英文). 喺2024年8月17號搵到.
  23. ↑ "Ask me anything about subtitling". ProZ (網上論壇) (英文). May 3, 2016. 喺2024年8月17號搵到.

連結

[編輯]
維基同享有多媒體嘅嘢：
字幕
由「https://zh-yue.wikipedia.org/w/index.php?title=字幕&oldid=2185329」收