回呼函數

回呼函數（英文：callback function，本來淨叫 callback）係泛指任何佢嘅參照會傳嚟傳去嚟用嘅子程式。實際啲講，就即係用某種方法指定，喺某啲情況下（例如某特定嘅事件發生咗，或者符合咗某條件嗰陣）執行嘅子程式；指定嘅方法包括將佢擺喺張表入面、將佢當做程式參數咁用、擺佢喺個變數度等等。

要用回呼函數，隻程式語言一定要有方法以資料類型表達函數本身或者函數嘅參照，前者可以係碼塊或者閉包（closure），而後者就可以係位址、指標（function pointer）或者識別碼（即係子程式個名）；如果喺某隻程式語言入面冇辦法表示回呼函數嘅參照，嗰隻程式語言會用唔到回呼函數。

回呼函數可以用嚟處理非同步操作，例如用嚟處理（唔知幾時發生，或者唔知會唔會發生嘅）事件、定時器或資料請求完成後執行某啲操作。

概念上，回呼函數係抽象化一種，將未知嘅動作抽象化，變成參數或者變數，可以令到程式碼更具有彈性同可重用性。呢種設計模式可以令到開發人員將程式邏輯同具體嘅操作分開，並喺需要時調用回呼函數以執行特定嘅任務或操作。

例子

決定型執行

首先嚟個簡單嘅例子，唔涉及任何非同步操作。喺呢個 Perl 嘅例入面有兩個子程式預咗用嚟做回呼函數，叫 a 同 b；另外一個子程式 g 有兩個參數，參數一係指定嘅函數（亦即係回呼函數），參數二係一個數值。主程式第一次用回呼函數 a，第二次用回呼函數 b，第一次會輸出 g(a, 20) = a(20, 10) = 20 + 10 = 30，第二次輸出 g(b, 20) = b(20, 10) = 20 - 10 = 10。

use feature 'signatures';
no warnings 'experimental::signatures';

# 回呼函數之一
sub a ($x, $y) {
	return $x + $y;
}

# 回呼函數之二
sub b ($x, $y) {
	return $x - $y;
}

# 用回呼函數嘅子程式
sub g ($f, $x) {
	return &$f($x, 10);
}

# 主程式
printf "%d\n", g(\&a, 20);
printf "%d\n", g(\&b, 20);

子程式 g 唔知指定嘅回呼函數其實會做乜，但係假定佢有一個參數，亦假定佢會輸出一個數值。喺呢個例入面，指定回呼函數嘅參數係現成函數嘅參照。

呢個例唔一定要咁寫；喺 Perl，回呼函數可以係閉包，亦可以係識別碼，不過用識別碼嘅做法喺目前並唔鼓勵。

非同步執行

喺呢個 Javascript 嘅例入面，主程式呼叫一個叫 doSomethingLater 嘅子程式，參數係以閉包形式封存嘅回呼函數。doSomethingLater 呼叫標準函數 setTimeout 嚟設定一個 1000 毫秒（即係一秒）嘅定時器，第一個參數係另一個以閉包形式封存嘅回呼函數，後者呼叫以特定參數 ｢Done｣ 呼叫主程式畀佢嘅回呼函數。整體上，｢Done｣ 呢個訊息會喺主程式開始執行嘅一秒後輸出。

// 回呼函數作為參數傳遞畀另一個函數
function doSomethingLater(whatToDo) {
    setTimeout(function() {
        whatToDo("Done");
    }, 1000);
}

// 呼叫包含回呼函數嘅函數
doSomethingLater(function(result) {
    console.log(result); // 輸出: "Done"，喺1秒後執行
});

技術上，喺呢個例入面嘅兩個回呼函數都係閉包本身，因為閉包喺定義上就即係冇名嘅函數，所以呢個例子比較複雜，因為涉及到兩個唔同嘅回呼函數；主程式畀嘅回呼函數喺子程式用嚟畀 setTimeout 用，係決定型執行，但係 setTimeout 嘅第一個參數亦係回呼函數，係非同步執行。

概念上，呢個例示範嘅係將 doSomethingLater 要做嘅動作抽象化；動作會喺內定（hard code）咗嘅時間後做，但係要做乜嘢動作，就喺參數指定。主程式同 doSomethingLater 之間有個默契，就係回呼函數會接受一個參數。

優點

• 非同步操作：回呼函數通常用喺處理非同步操作，例如事件處理、資料請求或定時器等。噉樣可以避免程式阻塞，提高應用程式嘅效能同反應速度。
• 模組化同可重用性：使用回呼函數可以將程式碼模組化，令到程式具有更好嘅結構性同可重用性。開發人員可以定義一次性嘅回呼函數，然後喺需要時重複使用。
• 事件處理：喺事件驅動嘅程式設計中，回呼函數可以用喺處理唔同嘅事件，令到程式碼更具靈活性同可擴展性。
• 參數靈活性：回呼函數可以接受唔同嘅參數，令到函數更具通用性同彈性。噉樣可以令到函數更容易擴展同適應唔同嘅情況。

缺點

• 回呼地獄（callback hell）：當回呼函數嵌套過深或過多時，可能導致程式碼可讀性下降，出現所謂嘅「回呼地獄」問題，令到程式難以維護同理解。
• 錯誤處理困難：回呼函數嘅錯誤處理可能較為困難，特別係當多個回呼函數鏈接喺一齊時，可能難以追蹤同處理錯誤。
• 執行順序難以預測：當使用多個回呼函數時，執行嘅順序可能難以預測，尤其是係處理非同步操作時，可能會出現意外嘅執行順序。
• 可讀性同維護性：過多嘅回呼函數可能導致程式碼複雜度增加，降低程式碼嘅可讀性同維護性，令到代碼難以管理同修改。

出面網頁

• Javascript 入門教學 | Javascript Callback Function
• 什麼是Callback函式 (Callback function)
• 回呼函式 - 術語表
• JS筆記 何謂Callback Function?