Henning Warloe
Henning Warloe fødd 24. mars 1961 i Bergen er ein norsk politikar frå Høgre. Han er fødd og voks opp i Bergen. Warloe er utdanna befal. Han er også utdanna ved Norges Handelshøyskole. Utanfor politikken har Henning Warloe vore dagleg leiar for eit eige firma, og var ein av stiftarane av Ferieklubben i Bergen. Ved stortingsvalet 2009 vart Warloe valt inn på Stortinget frå Hordaland.
I valperioden 2003–2007 var Warloe byråd for finans, kultur og næring i Bergen kommune. Frå 2007 var han byråd for kultur, idrett og næring, i tillegg at han sidan utreiinga til Framstegspartiet frå byrådssamarbeidet våren 2009 også har fungert som byråd for finans, konkurranse og utvikling fram til han måtte trekkje seg for å tiltre på Stortinget. I perioden 2. juni 2006–31. januar 2007 fungerte Warloe som byrådsleiar då Monica Mæland hadde barselpermisjon. Han var nestleiar i Hordaland Høgre frå 2007 til mars 2012.
Ein av hobbyane til Henning Warloes er trylling, og i 2008 vart han valt til president i Magiske Cirkel Norge, ein landsomfattande samskipnad for tryllekunstnarar.
Etter ein politaksjon i stortingsbustaden hans i mars 2012 vart Warloe gripen av politiet og sikta for innehav av narkotika og brukarutstyr.[1] Kort tid etter trekte han seg grunna politisaka frå alle politiske verv, med unntak av representasjonen på Stortinget. I løpet av året var Warloe ei rekkje gongar i media. Ei veke etter pågripinga innrømma han at narkomisbruket hadde pågått over ei lengre tid, og i eit lengre VG-intervju stadfesta han å ha rusa seg på narkotikastoffa amfetamin, kokain, GHB og Ecstasy i gjennomsnitt annankvar helg i eit år. Seinare same år skulda Warloe poltiadvokat Bjørn Pettersen ved Romerike politidistrikt for å vere inhabil. I november 2012 vart siktinga utvida til også å gjelde kjøp og bruk av narkotika.[2] Under rettsaka i Oslo tingrett 4. februar 2013 nekta Warloe for kjøp av narkotika, men innrømde bruk. Aktor la ned påstand om 26 dagars betinga fengsel med prøvetid på 2 år. Dom i saka fall 6. februar, og Henning Warloe vart dømd til 18 dagars fengsel på vilkår, med ei prøvetid på 2 år. Mykje av bevisføringa i saka dreidde seg om meldingar sende frå profilen til Warloe på nettstaden Gaysir. Warloe tar ikkje attval til Stortinget i 2013.[3]
Stortingskomitear
- 2009–2013 medlem i Kyrkje-, utdannings- og forskingskomiteen
Bakgrunnsstoff
- Henning Warloe hos Stortinget
- Henning Warloe hos Hordaland Høgre.
Fotnotar
- ↑ Blindheim, Anne Marte (4. februar 2013). «Narkochattet på homonettsted». Dagbladet. Henta 5. februar 2013.
- ↑ Tønder, Finn Bjørn (1. november 2012). «Warloe tiltalt for bruk og kjøp». Bergens Tidende. Henta 5. februar 2013.
- ↑ Klungtveit, Harald S (6. februar 2013). «Avslørt av narkosex-meldinger på homonettsted». Dagbladet. Henta 6. februar 2013.